Naipilaanen ti kaso a Presidential Decree 1602 wenno Anti-Illegal Gambling Act kadagiti innem a nagdadado a nakemmeg bayat ti anti-illegal gambling operation idiay Barangay Ayusan, Vigan City, Ilocos Sur idi rabii ti August 10, 2025.
Dagiti suspek ket agtawen iti tallopulo ket pito a lalaki ken agtawen iti uppat a pulo ket uppat a lalaki nga agpada nga agnaed iti siudad ti Vigan kasta pay iti agtawen iti limapulo a lalaki a taga-Pantay Laud, lalaki nga agtawen iti uppat a pulo ket walo a taga-Pantay Daya, maysa a babai nga agtawen iti uppat a pulo ket uppat ken ti lalaki nga agtawen iti uppat a pulo ket maysa, agpada a taga-Barangay Pantay Fatima.
Iti pannaki-uman ti Bombo Radyo Vigan ken ni PLt. Col. Reynaldo Mendoza Jr. iti Vigan City Police Station, agtaltalinaed iti kustodiya dagiti pannakabagi ti linteg dagiti nasao a suspek a naaktuan a naggaay-ayam iti dado iti maysa a natayan iti nasao a lugar.
Karaman iti naala manipod kadagiti suspek ket ti 241 poker chips, dado paraphernalia, maysa a kayo a lamisaan, sangapulo ket pito a plastic chair ken pusta a P9,290.
Impalagip ni Mendoza a maiparit iti panagay-ayam ti dado ta maikaniwas dayta iti linteg ta bassit man wenno dakkel a gatad iti ipusta ket siguradoenda a dagiti makipaset ket makemmeg.
