VIGAN CITY – Im-imbestigaran dagiti otoridad nu apay a nauram ti maysa nga ancestral house idiay suli ti Gen. Luna ken Plaridel Street, Vigan City a nakatayan ni Eric Hassan Singson Hernandez nga agtawen ti lima pulo ket maysa nga agnaed idiay Barangay 1, Vigan City.
Idi nakadanun dagiti kameng ti Bureau of Fire Protection- Vigan City iti nauram a pagtaengan, dakkelen iti apoy a nangkayamkam ti dua a kadsaaran a pagtaengan iti laksid a nakapagresponde da a sigida iti tawag kadakuada nga adda uram a kas pinasingkedan ni Fire Officer 3 Romel Amano.
Mapatta-patta nga umabot ti nasurok nga uppat a gasut walo pulo a ribo a pisos iti gatad iti nauram a pagtaengan ket nagpaot ti dua nga oras iti pannakadepdep iti uram nga immabot iti maikadua nga alarma sakbay a naideklerar a fireout.
Pinasingkedan ni Amano a saan da nga insigida a nakita ti biktima a nauram iti uneg ti pagtaengan ta awan iti nanggegda a nagpaarayat.
