Naisalakan ti tourist police officers ken dagiti opisial ti barangay ti maysa nga ubing a dandani nalmes bayat nga agdigdigus kadua ti pamilia na iti kabaybayan iti ili ti Sinait.
Nagisayangkat ti police presence dagiti kameng ti Sinait Tourist Police Assistance Center (TPAC) iti Maldives of Ilocandia idiay Barangay Dadalaquiten Sur iti nadakamat nga ili idi makangeg da ti maysa a pamilia nga agkidkidaw ti tulong.
Segun iti pulisia, ti ubing ket narigatan nga aglangor iti narabaw a paset ti kabaybayan.
Dagus a nagresponde dagiti tourist police iti tulong dagiti opisial ti barangay tapno maipan ti natalged a lugar ti ubing.
Dagus met nga intaray dagiti kameng ti Sinait Municipal Police Station ti ubing iti kaasitgan a balay pagagasan para ti naan-anay a pannakataming na ken addan iti natalged a kasasaad.
