Inyatiddog pay ti Philippine Amusement and Gaming Corp. (PAGCOR) ti tulong kadagiti umili a naapektaran ti layos iti nagsasaruno a bagyo ken monsoon rains ta nakaipaaydan iti nasurok P67 million.
Segun ti state gaming regulator, ti manarimaan a relief mission-da ket nakatulongandan iti 74,000 a pamilia idiay Metro Manila ken Luzon a nakaawat ti food ken non-food packs a naglaon iti essentials kas ti bagas, canned goods, noodles ken kape karamanen ti hygiene kits ken sleeping mats.
Pinasingkedan ni PAGCOR Chairman Alejandro Tengco nga iti maudi a lawas iti Hulyo, nakaiwaras ti ahensya ti 41,000 relief packs nga aggatad ti P37 million idiay Zambales, Bulacan, Laguna, Mindoro, Rizal, Tarlac, Nueva Ecija ken Olongapo City.
Naiwaras pay ti PAGCOR ti P30.41 million a gatad ti tulong kadagiti apektado a residente idiay Manila, Quezon City, Marikina, Parañaque, Cavite, Batangas, Rizal, Bulacan, Occidental Mindoro, La Union ken Laguna.
