Inallukoy ti Trade Union Congress of the Philippines (TUCP) dagiti kompania wenno employer a mangdatag ti Heat Risk Action Plan iti baet iti nakaru a heat index idiay Metro Manila ken dadduma pay a lugar iti pagilian.
Segun ti TUCP, napateg nga ipangruna ti salun-at ken pagsayaatan dagiti mangmangged nga agbibiahe nga agturong iti trabaho ken mismo a workplaces.
Karaman kadagiti naisingasing nga addang ket ti kaadda ti heat break nangruna kadagiti outdoor workers kangrunaan iti kabaraan nga oras, manipod alas onse iti bigat agingga alas dos iti malem.
Insingasingda pay ti maysa a buddy system a mabantayan ti kasasaad dagiti mangmangged.
Kasta pay iti kaadda ti agtultuloy a suplay iti danum a mainom tapno mapagtalinaed a hydrated wenno maka-inomda nu mawaw-da.
