Dead on the spot ti maysa a tricycle driver kalpasan a natupakan ti kayo iti acacia iti nagdiayanna a tricycle iti Innanus TODA Parking Area, Dakota Street, Barangay Poblacion Sur, Sta. Maria, Ilocos Sur itay alas tres iti malem, August 24, 2026.
Ti biktima ket lalaki nga agtawen iti uppat a pulo ket lima, naasawaan nga agnaed idiay Barangay Poblacion Sur, Sta. Maria a driver iti Red Rusi tricycle.
Iti pannaki-uman ti Bombo Radyo Vigan ken ni PLt. Jenson Refuerzo nga OIC iti Sta. Maria Municipal Police Station, nakaawatda ti tawag maipanggep ti pannakabual ti kayo nga acacia iti parking area a nakatupakan iti dua a tricycle isu nga insigidada a nagresponde kadua dagiti kameng ti Municipal Disaster Risk Reduction and Management Office (MDRRMO), Bureau of Fire Protection (BFP) ken Engineering Office.
Segun ken ni Refuerzo, iti pannakisarsaritada iti sumagmamano a tricycle driver ket napansinda a ti kayo ket in-inut a natumba isu a pinukkawanda dagiti tattao nga adda iti lugar nga umakar ngem saan a nanggeg ti biktima ta nakaturog iti uneg iti tricycle-na.
Kinuna ni Refuerzo a naitupak iti sibubukel a kayo iti acacia iti tricycle a gappuanan ti panagsagaba ti tricycle driver iti severe traumatic injuries gapu iti impact a rason iti nakatayanna.
Patien dagiti otoridad a gapu iti agtultuloy a panagtudo iti rason no apay a limmukneng ken nabual iti nasao a kayo ta kadagita a gundaway ket saan met a napigsa iti angin.
Patta-pattaen dagiti otoridad a nasurok pitopulo wenno walopulo a tawenen ti kapaut ti nasao a kayo a mabalin a rason no apay a natwang.
