Panawagan ti ACT Teachers Partylist a maisayangkat ti “thorough investigation” maipanggep iti operasyon nga insayangkat iti 79th Infantry Batallion iti Philippine Army idiay Toboso, Negros Occidental a nakatayan dagiti sangapulo ket siam a tattao.
Iti pannaki-uman ti Bombo Radyo Vigan ken ni Rep. Antonio Tinio, ti addang ket tapno umado ti pagbasaran no pudno a rinnupak iti napasamak no apay a nagado iti sibilyan a karaman a natay.
Segun ken ni Tinio, posible a pudno nga adda nakarinnupak ti Philippine Army ngem saan nga amin a napapatayda ket kameng ti New People’s Army.
Kinunana a maysa kadagiti natay ket am-ammona a personal isu ni RJ Ledesma a maysa a journalist a nakabase idiay Bacolod ket nakaduana laeng idi February 28, isu a saanna a patien nga NPA daytoy no diketdi ak-akemanna iti trabahona kas journalist.
Patienna a masapul a malawagan ti nasao a rinnupak ta saan laeng a ni Ledesma iti patienna a saan nga NPA ta adda pay nairaman a dua a Filipino-American.
Innayonna a masapul iti nainget nga imbestigasyon ta patienna nga iti baet ti rinnupak a naisayangkat ket siguradoenna a rumbeng nga adda latta pagannurotan a suroten ta ibilangna a masaker iti pasamak gapu ta adda nairaman a sibilyan.
