VIGAN CITY – Saan unay a maka-apekto iti panagsagsagana ti Commission on Elections (COMELEC) para ti May 2022 national elections ti temporaryo a pannakaipasardeng iti nationwide voter registration a mangrugi itatta nga aldaw agingga inton agtapos iti agdama a bulan gapu ta umad-adu ti bilang dagiti naapektaran ti coronavirus disease 2019 ditoy pagilian.
Ti pannaki-uman ti Bombo Radyo Vigan, inlawlawag ni Comelec spokesman Dir. James Jimenez a dayta ket gapu ta adu pay laeng iti gundaway dagiti tattao a mabalin nga agparehistro agsipud ta agpatingga ti voters’ registration para iti nasao nga eleksyon inton September 2021.
Innayon na a saan laeng a ti panagparehistro dagiti regular voters iti posible a maisardeng nu di ket pati dagiti panagparehistro pay kadagiti oversease registration center ngem dayta ket mapagpapatangan to pay laeng ti Comelec en banc inton bigat, March 11.
Kabayatanna, ad-adalen pay laeng ti poll body nu anya dagiti lugar a pakaisayangkatan ti pilot testing para ti online mobile application agsipud ta dagiti lugar nga immun-unan a nabigbig a pilot testing area ket naapektaranen ti COVID- 19 kas ti Spain ken dadduma pay a paset ti Europe.
