VIGAN CITY – Naipaagas dagiti karaman iti aksidente iti national highway ti Barangay San Clemente, Magsingal, Ilocos Sur a nakairamanan ti maysa a bisikleta ken motorsiklo.
Ti nagbisikleta ket ni Florendo Ujano, agtawen iti limapulo ket siam, agnaed iti Barangay San Clemente, Magsingal.
Ti met nagmaneho iti Black Yamaha Aerox ket ni Patrolman Jayson Bergonia Arubio, agtawen iti duapulo ket walo, PNP member a naidestino idiay Batac City Police Station, agnaed iti Ayusan Note, Vigan City.
Kabayatanna, ti maysa pay a Gray Yamaha Aerox ket minaneho met ni Ronald Gabuat Aliascon, agtawen iti tallopulo ket innem, machine operator, taga-Barangay 10, Vintar, Ilocos Norte.
Agpapada nga agpaamianan dagiti lugan ket idi magtengda ti nakapasamakan ti insidente, bigla a bimmallasiw ti bisikleta nga adda iti shoulder lane ken nadungpar ti Black Yamaha Aerox.
Ti met sumarsaruno a Gray Yamaha Aerox ket natukbobna met ti Black Yamaha Aerox.
Gapu dayta, nadunor ti ulo ken nadumaduma a paset ti bagi ti nagbisikleta, nakapasar met iti lemma ti bagi ti nagmaneho ni Gray Yamaha Aerox idinto a ti drayber met ti Black Yamaha Aerox ket agalenna ti akin-kannawan nga imana.
Nakainom ti nagbisikleta, idinto a nakahelmet dagiti dua a nagmotorsiklo idi napasamak ti insidente.
