VIGAN CITY – Kaso a panaglabsing ti Comprehensive Dangerous Drugs Act of 2002 ti tallo a kameng ti maysa a pamiliya idiay Abra kalpasan iti pannakakemmegda iti anti –illegal drugs operation idiay Zone 6, Barangay Sinapangan, Bangued, Abra.
Ti pannaki-uman ti Bombo Radyo Vigan ken ni P/Maj. Ricky Dangioan ti Bangued municipal police station, dagiti suspek ket da Reymond Bayle, agtawen ti tallopulo ket lima, tricycle driver; Marcela Imelda Belmonte, agtawen ti uppat a pulo ket uppat ken ni Christian JC Dungca, agtawen ti duapulo ket tallo nga anak ni Belmonte nga agpada nga agnaed iti nasao a lugar.
Nakemmeg dagiti suspek babaen iti search warrant nga inparuar ni Hon. Mia Joy Oallares- Cawed, executive judge ti Regional Trial Court, Baguio City ken babaen iti nagtitipon a pwersa dagiti pulis ken miyembro ti Philippine Drug Enforcement Agency – Cordillera Administrative Region.
Naala iti uneg ti pagtaengan dagiti suspek ti siyam a piraso ti small heat sealed transparent plastic sachet a naglaon iti mapapati a shabu nga aggatad ti innem a pulo ket lima ribo a pisos ken nadumaduma a drug paraphernalia.
Dagiti suspek ket nabayag a sinip-siputan dagiti otoridad sakbay nga inpakatan da iti search warrant operation.
