Tallo ti nakemmeg gapu iti panagpaputok ken panagikotda iti paltog idiay Barangay Pagangpang, Galimuyod, Ilocos Sur.
Nabigbig dagiti suspek a da Meynard Gadong Del Rosario, agtawen iti duapulo ket pito, security guard; Kristofer Balbin Domogan, agtawen iti uppat a pulo ket dua, bouncer, agpada a taga-Barangay Bidbiday, Galimuyod; ken ni Rikson Pascua Molina, agtawen iti tallopulo ket lima, bouncer, taga- Barangay Mabayag, Galimuyod.
Nakaawat ti Galimuyod Police Station iti tawag manipud ken ni Police Staff Sergeant Philip Miguel, off-duty personnel nga idi agawid ket nakitana dagiti suspek nga agpap-paputok iti paltogda iti paset ti Pagangpang-Bidbiday road, isu a tinawaganna dagiti personnel ti stasyon a nagresponde iti lugar.
Idi makadanon dagiti pannakabagi ti linteg, awanaen dagiti suspek iti lugar, isu a nangiwayatda nga insigida iti hot pursuit operation a nakakemmegan ni Balbin ken nakumpiskar kenkuana ti maysa a unit ti caliber 38 revolver, uppat a live ammunition para iti caliber 38, ken maysa nga empty shell ti caliber 38, kasta payen ni Gadong, a nagpaputok iti paltog.
Ni met Molina ket nakemmeg idiay Barangay Mabayag, Galimuyod ken nakumpiskar kenkuana ti maysa a unit ti 9mm pistol ken maysa nga empty magazine.
Nakakustodian iti Galimuyod Police Station dagiti suspek tapno sangwenda ti kaso a panaglabsing iti Republic Act 10591 wenno ti Comprehensive Firearms and Ammunition Act ken ti Omnibus Election Code.
