Pinasingkedan ti Land Transportation Office (LTO) a ti a puraw a Cadillac Escalade nga addaan iti Senate protocol plate “7” a limmabas iti busway ti EDSA ken naglibas kadagiti traffic enforcers ket nairehistro iti Orient Pacific Corp., maysa a kompania nga imatmatonan ti ama ni Senador Sherwin Gatchalian a ni William ken ti kabsatna a ni Kenneth.
Nagpadispensar ti driver a ni Angelo Edpan ken ti company director a ni Omar Guinomla iti LTO ken nakaawatda iti traffic violation ticket ken nakumpiskar ti driver’s license ni Edpan.
Kabayatanna, inkari ni Senador Raffy Tulfo, chairman ti Senate public services committee, nga imbestigaranna ti unauthorized a pannakausar ti protocol plate, nga immunan nga imbaga ti LTO a peke.
Kinumpirmaran ni Tulfo a dagiti nakalugan ket kabagian ni Senador Sherwin Gatchalian, a simmangpet manipud Japan ken mapan iti maysa a casino.
Inlibak ni William Gatchalian nga isu ti pasahero ken nagpadispensar iti nasao nga insidente, ken kinuna a ti owner ken driver ket nagbayader ti multa iti LTO.
Inlibak met ni Senador Sherwin Gatchalian nga addaan isuna iti puraw a Cadillac Escalade.
