Dua a lugan iti karaman iti aksidente iti national highway idiay Barangay Parada, Sto. Domingo, Ilocos Sur iti 8:10 PM idi kalman September 24, 2024.
Ti nagmaneho iti Nissan Safari ket ni Jaubey Rudane Ujano Uclaray, agtawen iti uppat a pulo ket tallo, pharmacist, awan ti naipresentarna a Driver’s License nga agnaed idiay Barangay San Lucas, Magsingal idinto a ti nagmaneho iti Hyundai Starex Van ket ni Glenn Ramos Pacpaco, agtawen iti limapulo, naasawaan, adda driver’s license-na nga agnaed idiay Barangay 7 Pagburnayan, Vigan City.
Iti pannaki-uman ti Bombo Radyo Vigan ken ni PLt. Benito Ponce a Deputy Chief of Police iti Sto. Domingo Municipal Police Station, agturong iti amianan a direksyon ti SUV idinto nga aggapu iti bangir a direksyon ti van idin nadanonda iti nasao a lugar ket immagaw ti linya ti SUV a gappuanan iti panagdinnungpar dagiti dua a lugan, ken naisadsad pay iti concrete road guard iti laud a paset iti kalsada.
Segun ken ni PLt. Ponce, nupay awan iti nadunor kadagiti driver ken pasaheroda ket naipanda iti Ilocos Sur District Hospital- Magsingal para iti medico-legal examination.
Mapapati a naka-inom iti arak iti driver ti SUV idi napasamak iti aksidente.
Kabayatanna, saan pay a nakapagpatang dagiti dua a karaman iti aksidente ngem manamnama nga agsaritada para iti magastos kadagiti nadadael a paset iti lugan.
VIDEO – PLT. BENITO PONCE
