Inlawlawag ti National Bureau of Investigation (NBI) a saan nga opisyal nga empleado iti ahensia ti lalaki a nakemmeg kalpasan iti pammaltog idiay Senado idi rabii iti Mierkules.
Segun ken ni NBI Director Melvin Matibag, ni Mel Oragon nga immunan a naireport a driver iti NBI, ket maysa laeng a volunteer wenno force multiflier a simmurot kas driver ti grupo iti NBI agents a naideploy iti GSIS Compound.
Adda iti lugar dagiti NBI agents kalpasan a nakaawat ti request iti NBI manipod ken ni GSIS President ken General Manager Wick Veloso tapno tumulong iti panang-secure iti lugar ken panangpatalinaed iti kappia ken kinaurnos.
Kinuna pay ni Matibag a normal laeng nga armado dagiti nagresponde nga NBI agents ta paset dayta iti standard operational gear-da no adda security deployment.
Innayonna nga agar-aramat pay ti NBI dagiti volunteers ken naawagan nga “assets” wenno alpha tapno tumulong iti operasyon ken panagkalap iti intelligence reports gapu iti pagkurangan ti kameng.
