VIGAN CITY – Nakemmeg ni Ferdinand Tabalan nga agnaed idiay Sto. Tomas, Sto. Domingo babaen iti panangiwayat dagiti kameng ti Philippine Drug Enforcement Agency ken dagiti pannakabagi ti linteg iti buy bust operation idiay Brgy. Nalasin.
Segun ken ni P/Capt. Christopher Ramat, hepe ti Sto. Domingo Police Station, nagilako manen idi ti iligal a droga ti suspek ngem iti agdama ket dukduktalendan no siasino ti mangsupsuplay kenkuana agsipud ta adda ti kinatransaksyon ti suspek sakbay ti pannakakemmegna.
Makabulan a sinipsiputan dagiti pannakabagi ti linteg ti suspek ken patien ti hepe a dagiti nagkauna a natiliwda iti nasao met laeng a lugar ket adda pakainaiganda iti tunggal maysa.
Nupay kasta, nakaala dagiti operatiba manipud iti suspek ti dua a sachet iti mapapati a shabu, buy bust item ken maysa a piraso ti sangaribo a pisos.
Sumango ti suspek iti kaso a panaglabsing iti Comprehensive Dangerous Drugs Act of 2002.
