VIGAN CITY – Naiyakaren iti bangkay ti suldado iti pagtaengdanda idiay Sitio Turod, Panay Sur, Magsingal manipod Mira, Bantay nga immunan a nakaimasayaganna.
Ti nasao a suldado ket ni Private First Class Ariz Bautista, agtawen iti duapulo ket innem a karaman a na-ambush ti New People’s Army iti panagturongda a tumulong koma iti Disaster Response Team kalpasan ti magnitude 6.7 a gingined a idiay Abra idi napan a bulan.
Iti pannakipapatang ti Bombo Radyo Vigan ken ni Rona Orio, live-in partner ti suldado a natay a ni PFC Ariz Bautista, sakbay ti pannakatay ni Bautista ket nakaawid pay laeng idi October 19-25 ngem nagsubli idiay Abra idi October 26.
Segun ken ni Orio, ibagbaga idi ni Bautista bayat ti panagaywanna ti putotna a saanna a kayat ti agsublin ngem nakasubli met laeng idiay Malibcong, Abra a nakadestinoanna ket masansan nga agdamag nu ania iti ar-aramidenda ket nagkiddaw pay iti ladawanda.
Namin-ano a darasda pay laeng a nakapagsarita ngem nagtaka ni Orio iti kinakapsot ti bosesna a makipapatang ken panangibagana nga agannadda a kanayon idinto nga idi imbaga ni Orio nga agannad met ni bautista ket saanen a simmungat pay, ket daytan it maudi a gundaway a nagsaritada.
Nakigtot laengen ni Orio idi nagado nagmensahe kenkuana a makipagrikna ket saan a mamati isu nga adu a kumpirmasyon iti inaramidna agingga addan ti timmawag kenkuana manipod kasuldadoan a nangibaga a natayen ni Bautista.
Innayon ni Orio a nabayagen a kidkiddawen ni Bautista a maaddaanda iti anak ket pagyamananda ta naipaayen kadakuada ngem maladingitan met isuna gapu ta dua a bulan pay la ti anakna ket pimmusayen ti live-in partner-na.
