Dati a drug surrenderee ti maysa a street level individual a nakemmeg iti buy-bust operation idiay Barangay Sevilla, Sta. Cruz, Ilocos Sur.
Nabigbig ti suspek a ni Dodi Biteng, agtawen iti duapulo ket innem, agnaed iti nasao a lugar.
Iti pannaki-uman ti Bombo Radyo Vigan ken ni Police Major Vincent Tadeo, tawen 2016 idi simmuko ti suspek ngem sinublianna ti iligal nga aramidna.
Innayonna nga ammodan ti pagal-alaan ti suspek kadagiti ikotna nga iligal a droga nga isu ti dukduktalenda a nalaing.
Naala kenkuana ti nasurok kumurang 3.83 a gramo ti mapapati a napagango a bulong ti marijuana nga aggatad iti PHP459.6 a naikabil iti maysa a medium heat-sealed transparent plastic sachet.
Malaksid dayta, naala pay ti maysa a piraso ti genuine PHP500 a buy-bust money.
Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.
