VIGAN CITY– Agtaltalinaed a normal iti biag ngem ad-adda nga ag-alerto itatta dagiti Overseas Filipino Worker (OFW) kalpasan nga inyetnag ti Department of Foreign Affairs ti Alert Level 1 kadagiti Pinoy idiay Guam ken Northern Mariana Islands.
Segun kenni Charlie Pascua, tubo ti Ilocos Norte ngem agnanaed idiay Dededo, Guam, kalmado dagiti tattao ken dagiti adda iti Airforce Base a mangipasimudaag nga awan iti rebbeng a pagamkan.
Innayonna a saan da a mapagpapatangan a Pinoy iti pangta ti North Korea isu nga arig na simple laeng daytoy a damag.
Inpakaammo pay ni Pascua a nabayagen a pangpangtaan ti North Korea ti Amerika ngem awan iti mapaspasamak agsipud ta nakaalerto ti pwersa ti US ken naruam dan iti gubat.
Nupay saan a mabuteng, inpasigurado ni Pascua nga agtultuloy iti panangmonitor da iti sitwasyon para iti kinatalged da.
