Naragsak ti maysa a swimmer kalpasan a nakagun-od iti silver medal bayat iti 4th Southeast Asian Open Water Swimming Championships a naisayangkat idiay Boracay, Aklan.
Iti pannaki-uman ti Bombo Radyo Vigan ken ni Anton Paulo Dominick Della, nasayaat iti riknana a nakaiyawid ti medalya para iti pagilian iti biang iti international level.
Segun ken ni Della, no yarigna iti panagswimming-na iti pool ken iti open water ket narigrigat iti open water ta dua oras a naglangoy iti kompetisyon a saan pulos a nagsarsardeng ken namin-lima a daras laeng nga imminom iti laksid a 1,660 meters iti linangoyna.
Kinunana a saan nga umuna a gundawayna a nakisalip iti open water iti pagilian ngem no iti biang iti international ket isu iti umuna a gundawayna.
Imbingayna a nagtalek laeng isuna iti bagina ken kabaelanna ta masapul a natibker iti self-confidence-na ken saan a sumuko iti tunggal laban tapno magun-od latta iti arapaapna.
