Namnamaen ti maysa a swimmer manipod Region 1 a makagun-od iti medalya para iti Pilipinas iti mapaspasungadan a 12th Asian Age Group Championships a mapasamak idiay Bangkok, Thailand inton July 17 agingga 25, 2026.
Iti pannaki-uman ti Bombo Radyo Vigan ken ni Anton Paulo Dominick Della, kalikagumna a mangabak iti medalya uray bronze medal laeng ta aminado a narigat iti agbalin a laban ta international competition iti salianna.
Segun ken ni Della, saanna pay nga ammo dagiti posible a makasangona ngem siguradoenna nga adda dagiti nalalaing a swimmer a makalabanna manipod China, Japan, Thailand ken Vietnam.
Kinunana a dagiti kategorya a pakilabananna ket isu iti 1500m freestyle, 800m freestyle, 400 individual medley, 200 individual medley, ken 200m freestyle.
Awan met iti parikotda iti panagturongda iti nasao a pagilian ta baklayen ti Philippine Aquatics Inc. iti accommodation, flight ticket ken allowance-da.
Iti baet a saan a makasurot ti nagannakna wenno kameng ti pamiliana ket natalged ti riknana ta makaduana ti coach-na nga isu payen ti agbalin a guardian-na.
Maipalagip a nagbalin a kualipikado ni Della para iti 12th Asian Age Group Championships karamanen iti sangapulo ket walo pay a swimmer kalpasan iti insayangkat a Tryouts ti Philippine Aquatics Inc. a napasamak idi May 1 – May 4, 2026 idiay New Clark City, Pampanga.
