VIGAN CITY – Nabotosan a kas baro a Philippine Councilors League (PCL)- Ilocos Sur Chapter president ni Sangguniang Panlungsod member Janina Fariñas ti Vigan City.
Segun ken ni Fariñas, dakkel a pammigbig ken pakaidaydayawan para kenkuana iti mapili iti nasao a posisyon ngem dakkel met laeng a responsibilidad iti sangwen na ta masapul nga ipakita na kadagiti pada na a konsehal iti laing ti taga- Vigan a mangidaulo.
Inkari na nga uray nu narigat ken adu ti responsibilidad na, kalikaguman na latta a maipakita ti nasayaat a pannakilangen kadagiti umili.
Ti PCL ket gunglo dagiti konsehal iti syudad ken ili ditoy Pilipinas a ti incumbent a presidente ket ni idi ket Narvacan Councilor Luis “Chavit” Singson ngem masukatan to met laeng isuna ta nabotosan metten a mayor ti Narvacan idi May 13 midterm elections.
