VIGAN CITY – Dead on arrival iti balay pagagasan ti maysa a senior citizen a dinungpar ti motorsiklo idiay Brgy. Pandayan, San Juan.
Nabigbig ti biktima a ni Remigio Renon, agtawen iti innem a pulo ket walo nga agnaed idiay Guimod Sur ken ti nakadungpar kenkuana a motorsiklo ket minaneho ni Randy Villalon, agtawen iti duapulo ket innem nga agnaed idiay Caronoan.
Iti pannaki-uman ti Bombo Radyo Vigan ken ni P/Lt. Roland Villaluz, officer in charge iti San Juan Municipal Police Station, datin a na-stroke ti biktima isu nga adda ti tultulengna ken saan unay a makalasin.
Gapu ti dayta, mapapati a saan a nasiputan ti biktima ti lugan a nangdungpar kenkuana ken saan a ninamnama ti nagmaneho ti motorsiklo ti bigla a panagballasiwna nga isu a napasamak ti aksidente.
Nagsagaba ti nakaro a dunor ti biktima a puon ti nakatayanna idinto a ti nagmaneho ti motorsiklo ket nagsagaba iti dunor ti ulo, abaga ken saka a matamtamingen iti agdama.
Nupay kasta, nakasagana a makiareglo ti pamilia ti biktima ken saanen a mangipila ti kaso ta awan met ti nangayat ti pasamak.
