VIGAN CITY – Dinutukanen ni Presidente Ferdinand Marcos Jr ni Senador Sonny Angara kas baro a secretary ti Department of Education, sukatanna ni Vice President Sara Duterte a nagikkat manipud iti DepEd idi June 19, 2024.
Ni Angara ket adda ti extensive legislative history-na ken napagballigianna dagiti educational reforms sipud nagbalin a paset ti senado idi 2013.
Dagiti legislative achievements na ket pakairamanan ti Universal Access to Quality Tertiary Education Act ken ti Enhanced Basic Education Act of 2013.
Inyanunsyo pay met daytoy ti presidente kabayatan ti 17th Cabinet Meeting iti Malakanyang.
Kabayatanna, pinasingkedan met ni Angara a pakaidayawanna a pilien isuna ti presidente isu a yamanenna iti talek a naipaay kenkuana kas baro a mangidaulo ti DepEd.
Inkari ti senador ken baro a mangidaulo ti DepEd a sisasagana a makitrinnabaho kadagiti amin a sektor ti kagimungan, pakairamanan ti sinukatanna a ni Vice President Sara Duterte, tapno maipaayan iti de kalidad nga edukasyon ti kada ubing a Pilipino.
