Kayat a madusa ni Senador Erwin Tulfo dagiti abusado a negosyante nga aglablabsing iti price freeze nga ipatpatungpal ti Department of Trade and Industry (DTI) agingga May 10 tapno agserbi a salaknib dagiti aggatang iti baet ti tensyon idiay Middle East.
Segun ken ni Tulfo, arigna natalek dagiti sumagmamano a negosyante nga agpangina iti presyo uray adda price freeze gapu iti pammatida a saan a madanon ti monitoring ti gobierno dagiti tiendaan nangruna dagiti babassit a puesto.
Kinarit ni Tulfo iti DTI a saan a laeng a mangnamnama kadagiti maipaspasa a report no diketdi mangisayangkat iti actual nga on-ground inspection tapno masigurado iti nainget a panangsurot iti linteg.
Innayon a ti price freeze ket rumbeng a katinnulong iti dadduma pay nga addang iti gobierno iti baet iti marikrikna a krisis.
