Philippine exports, immabot iti record-high nga $9.87-B idi Setyembre

Inkari ti Department of Trade and Industry (DTI) tapno maganar dagiti oportunidad iti world trading kalpasan a mairekord ti kangatwan nga export value ti Pilipinas idi Setyembre.

Maibasar iti Philippine Statistics Authority (PSA), umabot iti 9.87 billion US dollars ti exports ti pagilian, nangatngato iti 35.6 percent no ikumpara iti 7.28 billion dollars iti isu met laeng a bulan idi napan a tawen.

Kangrunaan a mayex-export a produkto dagiti electronic product nga aggatad iti 6.92 billion dollars katukad iti 70 percent iti pakabuklan nga export.

Manipud Enero agingga Setyembre, ngimmaton iti 73.95 billion dollars ti pakabuklan nga exports, nangatngato iti 17.2 percent no ikumpara iti isu met laeng a panawen idi napan a tawen.