Nangipila ni Senador Imee Marcos iti gakat a mangbaliw ken mangsimpa kadagiti amin a paglintegan iti eleksion, babaen iti Senate Bill 425 a ti gagemna ket mabukel ti New Omnibus Election Code of 2025.
Segun ken ni Marcos, ti agdama nga Omnibus Election Code a naipatungpal idi 1985 ket saan a mayannatup ita a modernon ti panawen ket saanen nga umdas tapno masigurado a patas ti laban.
Dagiti manamnama a mabaliwan ket ti party-list system ken dagiti patakaran iti campaign finance.
Idi 2023, nakompleto ti Commission on Elections ti maysa a 964-page draft dagiti rebisyon iti OEC.
Segun iti European Union Election Observation Mission, nasurok 50 percent kadagiti probisyon iti OEC ket daanen, ken saanen a mayannatup iti 1987 Constitution ken kadagiti baro a paglintegan.
