Nangipila ni Senador Risa Hontiveros iti resolusyon tapno imbestigaran ti saan a patas a consumer protection policies iti Energy Regulation Commission (ERC) kasaruno ti report iti palya a singir iti kuryente gapu iti madi a meter readings.
Segun ken ni Hontiveros, adda mandato ti ERC tapno salakniban ti electric consumers, ngem sumagmamano nga agdama a polisiyada ket parigat kadagiti tattao a rumbeng a masalakniban isu a masapul a kitaen ken i-update.
Gagem ti Senate Resolution No. 509 a maammoan no adda umdas a salaknib kadagiti consumer iti salinong ti Republic Act No. 9136 wenno Electric Power Industry Reform Act (EPIRA) ken Magna Carta for Residential Electricity Consumers.
Dayta ket iti baet ti awan sarday a reklamo dagiti consumer maipanggep ti nangato nga electricity bills gapu iti madi a meter readings.
Nakalanad pay ti resolusyon nga uray bigbigen ti Magna Carta for Residential Electricity Consumers ti karbengan a kwestyonaran ti electricity bills, obligaren met ti ERC dagiti consumer a bayadan ti makukwestyon a singer kas prerequisite iti panag-apela iti madi a billing.
