VIGAN CITY – Kaso a panaglabsing iti Republic Act 10591 wenno ti Firearms and Ammunition Act ti maysa a lalaki a nakemmeg idiay Brgy. Suso, Sta. Maria babaen iti search warrant operation gapu iti iligal a panagikotna ti paltog.
Nabigbig ti suspek a ni Roy Cabusas Duldulao, agtawen iti limapulo ket lima nga agnaed iti nasao a barangay a ti search warrant na ket imparuar ni Presiding Judge Elizabeth Bringas iti Regional Trial Court Branch 72, Narvacan.
Iti pannaki-uman ti Bombo Radyo Vigan ken ni PLT. Joel Dasargo iti Sta. Maria Police Station, ar-aramaten ti suspek dagiti ikotna a paltog a pangbutbuteng kadagiti makaririna ken isu ti iparparangna kadagiti kainumanna no mabartek.
Nakaala dagiti pannakabagi ti linteg ti maysa a caliber 38 nga adda balana ken maysa a dadael, maysa a piraso ti holster ken bala ti caliber 50.
