Pinalubosan ti Regional Trial Court (RTC) Branch 27 idiay Lapu-Lapu City, Cebu ti kontrobersial a contractor a ni Sarah Discaya a maka-piyansa ti P1 milyon.
Daytoy ket adda pakainaiganna iti kaso a malversation of public funds ken panaglabsing iti Anti-Graft and Corrupt Practices Act mainaig iti maipagarup a ghost project idiay Davao Occidental.
Pinalubosan pay ti korte ti finance officer ti Department of Public Works and Highways (DPWH) idiay Davao Occidental a ni Czar Ryan Ubungen a maka-piyansa ti P300,000.
Segun ken ni Judge Nelson Leyco ti nadakamat a korte, saan pay a naan-anay dagiti ebidensia a maipasango ti prosekusyon tapno agtalinaed iti pagbaludan dagiti dua bayat nga agtultuloy ti trial.
Pinasingkedan ti korte nga awan pay ti testigo a mangpaneknek ti papel ni Discaya iti maipagarup a maanomalya a proyekto.
