VIGAN CITY – Sangapulo ket lima a burias a naikarga iti kurong-kurong ken naggapu idiay Ilocos Norte ti nasalamaan dagiti pannakabagi ti linteg iti animal quarantine checkpoint idiay Sinait.
Nabigbig ti suspek a ni Ricardo Raymundo, agtawen ti tallopulo ket siam nga agnaed idiay Brgy. Agustin, Sarrat, Ilocos Norte ken ti akin-kukua dagiti burias a ni Glessy Tamayo, agtawen ti uppat a pulo nga agnaed idiay Turod, Badoc.
Awan ti naipakitada a shipping permit ken dadduma pay a dokumento ti impastrekda a burias nga adda tattan iti Provincial Quarantine Office.
Kabayatanna, limapulo a tray ti itlog a naikarga iti van ti nasalamaan met iti animal quarantine checkpoint idiay Bio, Tagudin nga impastrek ditoy probinsia ni Aljes Niño Gungon, agtawen ti tallopulo ket walo nga agnaed idiay Purok 1, San Francisco, San Fernando, La Union.
Nupay kasta, nakemmeg ti suspek ta awan ti naipaikitana a dokumento kadagiti nasao a kontrabando ken naipanen iti Provincial Quarantine Office dagiti itlog.
