Sangapulo ket dua ti nabiktima iti illegal recruitment idiay Sta. Lucia, Ilocos Sur.
Ti suspek ket nabigbig a ni Brendalyn Segui Valdez, recruiter, agtawen iti tallopulo ket dua, taga-Baluyot Street, Barangay Fe Marcos, San Jose City, Nueva Ecija a nagpammarang pay kas Amie Gamboa Gonzales.
Idi July 20, 2024, maysa a managan iti Jovelyn Dumpit nga aplikante met laeng a taga-Barangay Baringcucurong, Suyo ti nangtawag iti maysa a biktima ket inyam-ammona ti suspek kas direct hiring manipud Korea.
Nagpatpatang ti suspek ken ti maysa a biktima iti tawag ket nagpayam-ammo ti suspek nga agent manipud Korea, nakaasawa iti Koreano ket kunana nga agkasapulan iti seasonal farmer worker a mapan iti South Korea.
Dagus met a nagpost ti biktima iti Facebook account na babaen iti nagan a Totnyl Juls Galleta Dumag ket nai-mention dagiti dadduma pay a biktima a makisarita iti immuna a biktima.
Naguyugoy dagiti biktima iti indiaya ti suspek a 1 to 2 months processing of papers tapno makapanda idiay Korea ken agsueldoda iti P80,000 agingga P85,000 kada bulan.
Hulyo ken Agosto ita a tawen, nangrugi nga agdawat ti suspek iti kuarta babaen iti chat message kas bayad iti pannakaiproseso iti papel dagiti aplikante wenno biktima.
Segun pay kadagiti biktima, nagipatpatulod ti tunggal maysa kadakuada iti nasurok kumurang P20,000 iti suspek babaen iti Gcash, bangko, Palawan Express, ken Cebuana.
Agosto 18 iti bigat, kinasinnarak ti suspek dagiti amin nga aplikante para iti assessment-da ket nakipatang nga awan kadakuada pay laeng ti makapan idiay Korea.
Kayat nga ibabawin dagiti biktima/aplikante ti aplikasyonda ngem saan pay nga insubli ti suspek ti kuarta a naipatulodda kenkuana.
