Plano nga ipa-subpoena ti House Committee on Justice ti amin a bank records ken Statement of Assets, Lialibilities, and Net Worth ni Vice President Sara Duterte idi isuna pay laeng ti mayor ken bise mayor ti Davao agingga iti puestona ita.
Pinasingkedan daytoy ni Senior Deputy Minority Leader ken Mamamayang Liberal Partylist Rep. Leila de Lima nga isu ti endorser ti maikatlo nga impeachment complaint ken ni VP Duterte nga impila ti grupo dagiti padi, madre, ken dagiti abogado.
Segun ken ni De Lima, iti impeachment proceeding ket adda turay ti komite nga ipapasa ti SALN ken bank records ni VP Sara mainaig iti pammabasul a naipalaon iti reklamo nga impeachment a mapapati nga adda ti saan a mailawlawag a kinabaknang ken makapaatap a deklarasion ti SALN-na.
Sakbay a nagbibinnotos dagiti miembro ti Komite iti sufficiency in substance dagiti 2 nga impeachment complaint ket imparang ni Bicol Saro Rep. Terry Ridon nga iti uneg ti 16 a tawen wenno manipud iti 2008 agingga 2024 ket ngimmato iti P70 million wenno 378 percent ti baknang ni Duterte.
