VIGAN CITY – Saan a naikkat a saksakan ti electric fan ti rason ti pannakauram ti maysa a pagtaengan idiay Barangay San Clemente, Magsingal, Ilocos Sur.
Ti pagtaengan ket kukua ni Jojo Arellano Rubio nga agtawen iti uppat a pulo ket dua.
Iti pannaki-uman ti Bombo Radyo Vigan ken ni SFO4 Robin Rafanan nga Acting Municipal Fire Marshal iti Magsingal, ti karruba ti biktima iti nakapansin a maur-uramen ti pagtaengan isu nga impakaammoda iti pasamak.
Segun ken ni Rafanan, napaspas a nagkayamkam ti uram ta naaramid laeng a light materials ti pagtaengan ket immabot ti dua nga oras sakbay a nadepdep.
Naamoan a nabayagen a nakasaksak ti nasao nga electric fan isu a nag-over heat ken rason ti uram.
Awan ti nairaman a sabali a pagtaengan ta nasigod a nababasa iti kaabayna a balay tapno saanen a mairaman.
Umabot iti P800,000 iti gatad ti nadadael iti nasao a pagtaengan gapu ti uram.
Balakdna kadagiti umili nga agikkat latta kadagiti maisaksak nga appliances ken check-upen dagiti liquefied petroleum gas kadagiti pagtaengan nangruna nu pumanaw tapno maliklikan ti pannakauram.
VIDEO – SFO4 ROBIN RAFANAN
