Dinenggeg ti Regional Trial Court iti Lapu-Lapu City ti mosyon nga ibasura ti warrants of arrest a naipila kontra iti ti contractor a ni Sarah Discaya maipanggep ti P96.5 million a “ghost” flood control project idiay Davao Occidental.
Kiniddaw ni Atty. Michael David nga ibasura ti warrant of arrest kontra ti kliyentena nga immunan a nakemmeg ken naibalud idi napan a bulan gapu iti mapapati a saan a maar-aramat a flood control project iti probinsia.
Nangipila pay ti mosyon dagiti legal counsel ni DWPH District Engineer Rodrigo Larete ken walo pay a sabali nga opisyal ti DPWH Davao Region tapno ibasura ti information ken warrants of arrest kontra kadagiti kliyenteda.
Inkalintegan dagiti abogado nga awan ti hurisdisyon ti RTC Branch 27 iti Lapu-Lapu City tapno denggen ti kaso ta dagiti akusado ket saan a high-ranking officials, ken adda salary grade laeng a nababbaba ti 27.
Ti kangatoan nga opisyal a nakasoan ket ni Larete nga adda salary grade-na a 25.
Kinuna met ni Atty. Joseph Randi Torregosa nga abogado ni Larete a gapu ta mapapati a napasamak iti krimen idiay Davao Occidental a rumbeng laeng nga idiay iti pakadenggan ti kaso.
Maipalagip nga inyakar ti RTC Branch 20 iti Malita, Davao Occidental ti venue ti kaso idiay Lapu-Lapu City kas maibasar ti Supreme Court guideline a nairuar idi Nobyembre.
Impaganetget ni Torregosa a saan a pormal a napakaammoan ti kliyentena maipanggep ti pangngeddeng.
Mainaig dayta ket nagipila ti mosyon ni Ombudsman Mindanao prosecutor Atty. Marie Josephine De Vera tapno isubli ti venue ti panagdenggeg ti RTC Branch 20 iti Malita, Davao Occidental.
Manamnama a mangiruar ti resolusyon ti RTC Lapu-Lapu City maipanggep kadagiti mosyon sakbay ti January 13, 2026, ti naituding nga aldaw ti arraignment iti amin nga akusado iti nasao a ghost flood control project case.
