VIGAN CITY – Awan iti kina-agpaysona iti sayangguseng nga adu kadagiti employer idiay Hong Kong iti pumanaw a posible nga isu iti pakaikkatan dagiti adu nga Overseas Filipino Worker iti nasao a pagilian.
Dayta iti pinasingkedan ni Rose Galinato Alcid a taga- Candon City a mangidaulo ti OFW- North Alliance Ilocos Sur chapter idiay Hong Kong iti pannaki-uman kenkuana ti Bombo Radyo Vigan.
Segun ken ni Alcid, awan pay iti nadamag na a pada na nga OFW a napursaran nga agawid ken naterminate ti kontrata na ta pimmanaw idiay Hong Kong dagiti employer da nu di ket kanayon da laeng a mabilbilin a liklikan da iti mapan kadagiti pagprot-protestaan dagiti rinibo a tattao tapnu saan da a maisagmak.
Innayun na pay a natalged iti kasasaad da nu rumuwar da nu la ketdi suruten da ti bilin kadakuada ti Philippine Consulate a liklikan da iti agbado ti nangisit wennu puraw ta isu iti pagilasinan kadagiti protesters.
