Kinarit dagiti Republicans idiay America ni US President Joe Biden nga agikkaten iti puesto agsipud ta saanda a makontento iti addangna a nangibabawi iti kandidaturana iti kinapresidente.
Iti pannaki-uman ti Bombo Radyo Vigan ken ni Bombo International News Correspondent Leah Medado, ibilbilang dagiti Republicans a worst president ni Biden ket gapu iti panangibabawina a lumaban kas presidente, patiendan a husto dagiti maipabpabasul kenkuana.
Kontra pay dagiti Republican no ni Vice President Kamala Harris ti sumukat ken ni Biden a lumaban iti puesto ta malaksid iti kina-Democrat na, isu ti inawaganda a border czar ta isuna ti adda kontrolna kadagiti lumaslasat a migrante, banag a saanda a kayat.
Maibilbilang met a historical ti panag-withdraw ni Biden ta isu pay laeng ti umuna a nangaramid dayta kadagiti kimmandidato a presidente idiay Amerika.
Iti agdama, burburtia pay laeng kadagiti American people no ania ti rason iti panagbabawi ti presidente a tumaray ngem patien met ti dadduma a gapu iti salun-atna ta lumakayen ket amangan no saannanton a kabaelan dagiti sumarsaruno a kampanya.
