Patien ni House Deputy Minority Leader ken ACT Teachers party-list Rep. Antonio Tinio a saanen a makalisi ni Vice President Sara Duterte iti basolna iti madi a panagaramat iti confidential funds.
Segun ken ni Tinio, uray ibaga ni VP Sara a saan pay a pinal dayta ket saanna a malusotan dagiti Notice of Disallowance ti COA kontra kenkuana.
Ti ibagbaga ni Tinio ket ti pinal a desisyon ti Commission on Audit (COA) Proper a nangbilinan ken ni Duterte ken dadduma pay nga accountable official nga isubli ti P73 million confidential funds.
Ti nasao a gatad ket paset iti P125 million confidential fund a ginastos ni Duterte iti uneg iti sangapulo ket maysa nga aldaw idi December 2022. Ti pangngeddeng ket pinalen iti lebel ti COA ngem mabalin pay nga i-apela iti Korte Suprema.
Nangiruar pay ti COA ti Notice of Disallowance para iti P375 million confidential funds a ginastos ni Duterte manipod Pebrero agingga Setyembre 2023. Ti pangngeddeng ket mabalin nga i-apela iti COA Proper.
