Ibilang a dakkel a banag ni Bicol Saro Partylist Rep. Terry Ridon ti panangsuspenso ti Land Transportation Office iti panang-impound kadagiti light electric vehicle kas kadagiti e-bike ken e-trike a matiliwan nga agdalyasat kadagiti national road ta maikkan pay iti gundaway ti LTO ken dagiti amin nga agar-aramat a mapagpatangan dagiti pagannurotan a nasken a maipatungpal.
Maibasar iti LTO, inton Enero 2, 2026 a marugian ti nainget a pannakaipatungpal ti impounding.
Iti pannaki-uman ti Bombo Radyo Vigan ken ni Ridon, pagyamananna ni Presidente Ferdinand Marcos Jr ta no saana a binibiangan daytoy a banag ket amangan no matuloy ti impounding.
Namnamaen ni Ridon a ti maysa bulan a pawayway ket maikonsidera dagiti kiddawda a mandatory registration kadagiti nadagsen nga e-bike; saan a panangi-require iti lisensya kadagiti 50 kilos agpababa ti kadagsen ti e-bike-na; ken ti road safety seminar kadagiti amin nga agdaldalyasat iti kalsada.
Patien ti kongresista a tapno ma-regulate ti panagaramat iti e-bike ket nasken a mairehistro dagiti nadagsen nga e-bike ken adda lisensya dagiti agaramat.
Bigbigenna pay met ti dakkel nga akem dagiti Local Government Unit iti daytoy a patangan ta isuda ti paggapuan ti ordinansa mainaig iti panangpalubos kadagitoy a klase ti e-bike iti national highway.
