Kinumpirmaran ni OVP Assistant Secretary ken Assistant Chief of Staff Lemuel Ortonio a saan a kameng iti Office of the Vice President ni Col. Raymund Dante Lachica kalpasan a sinaludsod ni Senator-Judge Vicente Sotto III maipanggep ti employment status ni Lachica iti nasao nga opisina.
Insungbat ni Ortonio a saan a kameng iti OVP ni Lachica ken nadutokan isuna iti Armed Forces of the Philippines (AFP) kas group commander iti Vice Presidential Security and Protection Group (VPSPG).
Maipalagip a kinuna ni dati nga OVP Special Disbursing Officer Gina Acosta iti impeachment court a personal isuna a binilin ti bise presidente nga ited ti confidential funds ken ni Lachica kalpasan a na-withdraw ti kuarta iti Landbank.
Kinuna pay ni Acosta a saanna nga ited ti kuarta ken ni Lachina no awan ti approval ni Duterte.
Immunan nga inamin ni Acosta nga awan ti probisyon ti Joint Circular No. 2015-01 a mangbilbilin ken ni Lachica, kas security officer, nga agdisburse iti confidential funds.
Innayonna a ti panagiruar ti confidential funds ket responsibilidad ti nadutokan a disbursing officer.
