VIGAN CITY – Saan nga impagarup a makapasa ken ag-rank number 2 pay ni Airis Roshaine Gomez manipod Holy Angel University iti naisayangkat ng August 2024 Psychometrician Licensure Examination.
Iti pannaki-uman ti Bombo Radyo Vigan ken ni Gomez, gapu iti kinarigat ti examda ket impagarupna a mapaay iti exam isu a napalaus iti kigtotna idi nag-rank number 2.
Segun ken ni Gomez, narigatan iti exam nangruna iti psychological assessment ta uray idi agad-adal da pay laeng ket narigaten ti nasao a subject.
Imbingayna a saan a nadaras iti panagsaganana iti exam ta adda trabahona manipod Lunes agingga Biernes isu a nu dumteng ti break time na ket agreview ken bumawi iti weekend ta isu iti papanna iti testing center.
Aminado nga adda gundaway a mabannog iti utekna isu nga adu dagiti ar-aramidenna tapno maiyaw-awan ti marikriknana a kas iti panag-meditate, yoga, magna wenno tumaray kasta payen ti panangpalawlawna iti bagina iti support group.
Nupay napalaus iti ragsakna ket saan a nagariwawa idi nakitana iti naganna a rank 2 ta matmaturog pay laeng idi ti inana isu a ti nobyona ti nangibagaanna a nakapasa.
Nairuarna laengen ti napalaus a ragsakna idi nakadanonen iti trabahona ta adun ti nangkablaaw iti panagballigina.
VIDEO – AIRIS ROSHAINE GOMEZ
Innayonna nga adu met dagiti inaramidna a pammati sakbay, bayat ken kalpasan iti exam a patienna a nakatulong para iti pannakapasana.
Kabayatanna, balakadna kadagiti saan a nakapasa a saanda a sukoan ti arapaapda ta nupay napaayda ita a gundaway ket patienna nga addanto latta iti para kadakuada ken imbalakadna a saan nga agpaapekto kadagiti ibaga iti sabali a tao ta nasaysayaat nu suroten ti addang a kayat a magun-od.
VIDEO – AIRIS ROSHAINE GOMEZ
