VIGAN CITY – Nainget a quarantine checkpoint, monitoring ken surveillance iti ipatungpal ti Department of Agriculture (DA) kalpasan a nagpositibo ti African Swine Fever (ASF) virus dagiti natay a baboy idiay Rodriguez, Rizal.
Segun ken ni Agriculture Secretary William Dar iti pannaki-uman ti Bombo Radyo Vigan kenkuana, dagiti regional ken provincial offices a masakupan ti DA iti binilin na a mangipatungpal kadagiti nasao nga addang tapnu saanen a kumaro iti maapektaran ti ASF virus a nakastrek ditoy pagilian.
Kinunana, sakbay pay laeng a rumwar iti resulta iti panagadal kadagiti blood sample dagiti natay a baboy idiay Rizal a naipatulod idiay United Kingdom ket inpatungpal dan ti nainget a quarantine checkpoint, monitoring ken surveillance isu nga awan iti rumbeng a pagdanagan iti publiko.
Malaksid iti dayta, tattay bigat, sakbay a nagpresscon ni Dar ket nagboodle fight da pay, kadua na dagiti nangangato nga opisyal ti DA tapnu maipakita a nataled a sidaen dagiti karne ti baboy ditoy pagilian.
