VIGAN CITY– Natay uray nu naipaagas idiay Northside Doctors Hospital ni PO1 Rolly Dizor a taga-San Sebastian, San Vicente ngem nakadestino kas gate officer ti Ilocos Sur Police Provincial Office kas dusa na gapu ti mapapati a panangpaturong na iti paltog iti ngatoen na nga opisyal iti nakadestinoan na a police station idiay upland municipality, kasta payen iti panagputok-putok na.
Ni Dizor iti nanghostage iti maysa a babai idiay Alta Mira Subdivision, Aggay, Bantay manipud ti 6:45 iti rabii agingga ti 12:00 itay parbangon ken nanggudas iti bukod na a biyag kalpasan iti hostage crisis.
Segun ken ni PSInsp. Ramil Llaneras, hepe ti Bantay municipal police station, alas 2:3 itay parbangon idi nauyos iti anges ti pulis kabayatan iti pannakataming na idinto a ti hinostage na ket saan a nadangran ngem nakaro ti trauma a sinagaba na ta kiniddaw na pay a saan a maipakaammo ti kinatao na.
Naamuan nga idi kalman ket inawagan ti suspek ti ina na ket inbaga na a mapan na alaen idiay ISPPO ta madi ti bagbagi na ket idi nakalugan da iti tricycle, inbaga na iti driver nga ipagna na iti dalan a mapan idiay Alta Mira sa idi nakadanun dan iti akin-likod a paset iti subdivision ket inbaga na nga agawiden ti ina na san a kinalay-at iti alad isu a nakastrek.
Innayon na a kas maibasar iti istorya ti biktima, idi inpaturong ti suspek iti iggem na a paltog iti timid na, isun iti panagtaray na a rimuwar iti uneg ti pagtaengan a nagpaarayat kadagiti kameng ti linteg.
Inlawlawag ti hepe a saan a dinangran ti suspek ti biktima ngem pinagbalin na laeng a human shield idi adda da iti uneg ti banyo tapnu sigurado a saan a dangran dagiti otoridad a nakapalikmot iti nasao a pagtaengan.
