VIGAN CITY – Kiniddaw ni Agriculture Secretary William Dar iti provincial government a gatangen da ti irik a produkto dagiti mannalon, nangruna itatta a panawen iti panagtatalon iti pagay.
Ti panagsarita ni Dar iti naisayangkat a stakeholders’ forum ken pannakaiwaras dagiti alikamen ken makinarya iti pagtalon idiay Sta. Maria Sports Complex, naibaga na a tuladaen kuma ti Ilocos Sur ti Ilocos Norte, Isabela ken Nueva Ecija a dagiti provincial government da iti manggatang kadagiti apit nga irik dagiti mannalon iti lugar da.
Babaen iti nasao a wagas ket matulungan dagiti mannalon a mapasubli dagiti nagastos da iti panagtalon ken tapnu nangin-ngina iti presyo dagiti irik nga ilako da ta adda met ti pondo ti Republic Act 7171 nga usaren ti provincial government.
Gapu ta adda met iti nasao nga aktibidad ni Vice Governor Jerry Singson, inpasigurado na nga adalen to ti hunta provincial iti kiddaw kadakuada ti agriculture secretary babaen iti pannakikinnammayet da ti National Food Authority.
Malaksid ti agriculture secretary, adu pay nga opisyal ti DA Regional ken provincial office, kasta payen dagiti line agencies iti immatendar iti nasao nga aktibidad, malaksid laeng kadagiti mannalon ken mangngalap nga isu iti immawat kadagiti baro nga alikamen ken makinarya iti pagtalon nga inted iti ahensya.
Inpasigurado ti opisyal nga ad-adun to pay a pagsayaatan dagiti mannalon ken mangngalap ditoy probinsiya iti ited na.
