Maipagarup a mabalin a saanen nga ipasango ti House Prosecution panel ti amin nga uppat nga Articles of Impeachment kontra ken ni Vice President Sara Duterte no iti panagkita da ket naan-anayen ti naipresenta nga ebidensia tapno makaala ti conviction.
Segun ken ni Representative Joe Chua, mabalin da nga i-wave ti maysa wenno dua nga article no mapaneknekan da iti kaso babaen laeng ti duwa wenno tallo nga article.
Inlawlawag ni Chua a ti 62 nga aldaw a nailatang para iti prosecution iti naaprobaran a 92-day impeachment trial schedule ket basar laeng iti orihinal a listaan dagiti testigo ken mabalin pay daytoy a pabassiten.
Iti agdama, leplepasen ti prosecution ti panangtratar iti Article 1 nga adda pakainaiganna iti maipagarup a panagpangta ni VP Sara kontra kada Presidente Ferdinand Marcos Jr., First Lady Liza Araneta-Marcos, ken dati nga House Speaker Martin Romualdez.
Manamnama a sumango ni National Bureau of Investigation Atty. Melvin Matibag inton Hulyo 21 tapno leppasen ti presentasion iti umuna nga article sakbay a rugyan ti prosecution iti Article 2.
