VIGAN CITY – Naka-intensive care unit pay laeng ni Eulalia Lyn Gagto nga agtawen ti lima pulo ket dua, naasawaan, principal ti Manzante National High School nga agnaed idiay San Julian, Magsingal kalpasan iti pannaka-opera na idi rabii ta napaltugan idiay Barangay Manzante, Magsingal idi kalman.
Lima a tama iti paltog iti naduma-duma a paset iti bagi iti sinagaba ni Gagto gapu iti nasao a pammaltog idi agawid kuman a naggapu iti pagadalan.
Naala manipud iti nakapasamakan ti krimen ti innem a fired cartridge ti caliber 45 nga isu iti mapapati nga inusar dagiti saan pay nabigbig a suspek.
Kabayatanna, pinasingkedan met ni Police Captain Mark Lagman, hepe ti Magsingal municipal police station nga addan dagiti kitkitaen da a possible nga anggulo iti krimen ngem saan da pay laeng a mabalin nga ibuksilan tapnu saan a maapektaran iti imbestigasyon da.
Mamati ni Lagman a saan a mapaltugan ti biktima nu awan iti nakairamanan na nga isyu wennu awan iti parikot na iti laksid nga ibaga iti kameng ti pamilya ken dagiti makaam-ammo kenkuana a nasingpet ken naanus a mangisursuro ti biktima.
