Insingasing ti Bantay Bigas iti gobierno a maipatungpal ti price control imbes a mangituding iti Suggested Retail Price iti bagas.
Dayta ket kasaruno ti plano ti Department of Agriculture a panangipatungpal iti P53 kada kilo nga SRP iti bagas.
Iti pannaki-uman ti Bombo Radyo Vigan ken ni Cathy Estavillo, nangina latta unay ti P53 kada kilo ti bagas para kadagiti mangmangged wenno dagiti gagangay a konsyumer nangruna ita a nagpangina amin dagiti magatang ken serbisio gapu iti riribuk idiay Middle East.
Patien ni Estavillo a daytoy nga addang ti DA ket tapno laeng maipakita nga agtigtignayda ngem saan met a makatulong tapno maibaba ti presio ti bagas ken maibaba ti inflation rate ti pagilian.
Kabayatanna, inwaragawag met ti DA a posible nga iti kabiitan a panawen ket mairuar ti memorandum para iti pannakaipatungpal ti nasao nga addang.
