Dimmar-ay ni Pres. Ferdinand Marcos Jr. ti reception a naisagana para kadagiti pagilian a kumanandidato iti puesto iti United Nations Security Council (UNSC).
Gagem ti taripnong a mapapigsa ti kammayet dagiti pagilian ken makaala iti suportar para iti umadanin nga eleksyon dagiti miembro ti Security Council.
Inallukoy ni Marcos dagiti mangibagi iti agduduma a pagilian a suportaran ti kandidatura iti Pilipinas para iti non-permanent seat iti UN Security Council para iti tawen 2027 agingga 2028.
Segun ti presidente, nakasagana iti Pilipinas a makipaset iti panangpatalinaed iti kappia, seguridad ken kooperasyon iti international community.
Kinuna pay ti presidente a napateg a mangngeg ti Security Council ti boses dagiti pagilian manipod iti Global South pakairamanan iti Pilipinas tapno mapapigsa ti panagtitinnulong iti panangsango kadagiti karit kas iti tensyon iti agduduma a rehiyon, panagbaliw iti klima ken dadduma pay nga isyu iti lubong.
