Imbilin ti Office of the Municipal Mayor iti ili ti Santa, Ilocos Sur ti pre-emptive evacuation kadagiti coastal barangay gapu iti bagyo ‘Emong’.
Sagudayen ti Executive Order No 106 series of 2025 nga amin nga agindeg kadagiti coastal barangay ket nabalakadan nga agbakwit a mapan kadagiti evacuation center.
Iti pannaki-uman ti Bombo Radyo Vigan kan ni Municipal Disaster Risk Reduction and Management officer ti ili a ni Vince Clyde Cardenas, gagem ti addang a salwadan ti biag ken sanikua dagiti agindeg, kasta metten a siguradoen ti kinatalged ti publiko.
Uppat a lugar ti naituding nga evacuation center pakairamanan ti Paspas Primary Care Facility wenno Santa RHU para kadagiti masikog, masakit, babbaket ken lallakay ken dagiti agpaspasuso nga ina.
Dagiti pay sabali nga evacuation center ket ti Santa Elementary School, Santa Farmers Multipurpose, ken Knights of Columbus Building.
