Imimbestigaran ti National Privacy Commission (NPC) ti posible a privacy breach ti public display dagiti Posted Computerized Voter’s List iti sumagmamano a polling precincts idi napalabas a midterm elections idi May 12.
Segun ti komisyon, naipakaammo a naipaskil kadagiti lugar nga accessible iti publiko kas ti bulletin boards iti ruar ti voting precincts ti posted computerized voter’s list a naglaon kadagiti personal information dagiti botante pakairamanan ti kompleto a nagan, pirma ken residential address.
Imimbestigaran ti komisyon nu ti nasao a panangipakita iti publiko ti PCVLs ket naglabsing ti Data Privacy Act of 2012.
Inallukoy ti privacy body iti publiko a liklikan a picturen ti PCVL ken saan nga ipost iti social media wenno dadduma pay a platforms nga awan ti consent wenno permiso kadagiti nakalista nga indibidual.
Nagballaag ti komisyon a mabalin a maipakita ti privacy risks ti saan nga otorisado a panangipakita ti personal data ken posible a panaglabsing dayta iti linteg.
