Pasado kas maysa a political speech, ngem saan a kas maysa nga State of the Nation Address.
Dayta ti nagbalin a reaksion ti maysa a political analyst iti nagbalin a SONA ni Presidente Ferdinand Marcos Jr., a patienna a naglaon iti adu a positibo a damag ken napateg nga impormasion.
Nupay kasta, pinasingkedan ni Atty. Michael Henry Yusingco iti pannaki-uman ti Bombo Radyo Vigan a ti SONA ket saan laeng a maysa a political speech no di ket maysa a mekanismo nga intuding ti linteg tapno direkta a makapatang ti Presidente ti Kongreso ken maipakaammo ti legislative agenda ti administrasion.
Segun ken ni Yusingco, kurang ti SONA ti presidente iti panangitedna iti nalawag a direksion no ania dagiti addang a nasken nga aramiden ti Kongreso tapno masolusyonan dagiti kangrunaan a parikut ken pagkasapulan ti pagilian.
Impaganetget ti political analyst a napateg nga agserbi a tarabay ti SONA iti lehislatura tapno masigurado a masolusyonan dagiti isyu a sangsangwen ti pagilian babaen kadagiti kasapulan a linteg ken polisiya.
